Archive for ◊ March, 2011 ◊

• Wednesday, March 30th, 2011

A les 8:30 de la mañana d’un domingu nun hai muncha xente na cai, nun siendo los que tan volviendo pa casa dempués d’una nueche de folixa. Si sumamos amás qu’esa madrugada cambióse la hora, colo que lo que l’organismu entiende que inda son les 7:30, que pasó tola nueche lloviendo y que l’aire ta fríu, menos ganes tovía tendría la más de la xente pa salir de casa, a toos en xeneral-yos pasaría eso, ¿a toos? Non, a toos non, qu’ehí tábemos los miembros del grupu de montaña Ramón Mercader, a les 8:45 na estación d’autobuses d’Uviéu esperando al autocar que a les 9:00 diba llevanos camín de los valles del Trubia.

Tabemos tres namás, pocos, pero abondos.

A eso de les 9:30, dempués d’un viaxe nuna llinia claramente antieconómica (yeramos la mitá’l pasaxe) posámonos xunta’l pueblu de Vil.lanuova, capital del conceyu de Santu Adrianu, atravesáu pela nomada Sienda l’Osu, que percorrimos camín del monte Fernanchín, onde vivíen les oses Paca y Tola, agora treslladaes por mor de la fecundación a otru cercáu nel prau d’enfrente que comparten col machu Furacu, un recinto bien faltu d’intimidá, posible motivu del fracasu nos intentos de consiguir ñalgañinos que sigan la estirpe que tanta falta fai pa que’l turismo siga visitando’l valle.

Mesmu bordiando ‘l cercáu del Fernanchín arranca la sienda que percorre la foz de Picarós, un camín pindiu y pavimentáu de piedres yá gastaes y resbaloses que nos indiquen que, antañu, esi foi tarrén transitáu por carros del país. Dempués d’unos pocos kilómetros arrodiaos de Viesca, pisando llandes de la collecha de la pasada seronda, les güertes yá entamen a a apaecer a la vera del camín y llueu los lladríos de milenta perros nos saluden al aportar a l’aldea de Serandi, que traveasamos peles sos pindies cais camin de la caleya que s’empobina ganando altor al norte, a los llugares que los del publu llamen el Xuegu la Bola y los prados e Don Fernando y de Pila, onde termina’l formigón que mientres un pedazu estró’l suelu que vuelve a ser de tierra, yerba y piedres vueltu agora camín del sur, a topar les morteres del pueblu, nun sé si inda empleaes polos vecinos.

 

L’aire equí yá soplaba fuerte y fríu, pesie a que nun andábemos más arriba de los 800 metros, pero nuna fastera de la montaña totalmente abierta al valle y les montañes del oeste, eso por nun falar de la práctica ausencia d’árboles que pudieren cortar el vientu. Siguíamos caleyando, cada vez menos palabres ente nosotros, prueba del mayor esfuerzu que teníemos que facer, sobro too dempués de que a cada revuelta del camín, cuando yá pensábamos que aportábamos al mayáu Portiellu, puntu más altu d’el nuesu caminar, topábemos con que otra montaña inda nos esperaba detrás.

Pero por fin llegamos, y si bien l’aire y el fríu yeren inda más agudos ellí, la fermosura de les vistes facíen que tol esfuerciu tuviera bien emplegáu: Frente a nós, al este, la impresionante mole calizadel Aramo, na so lladera’l Puertu d’Andrúas, dende’l colláu de Pan de la Forca al norte hasta’l del Pandu la Mortera al sur. Zarrando per baxo’l puertu los picos Andrúas y Cutiay y, mesmo a los nuesos pies el Colláu de La Canal Seca, colos sos praos arrodiaos per mueries de piedra.

 

Anque yera inda un poco ceu, non más de les 12:30, súpiéronnos bien los bocadillos dempués del esfuerciu emplegáu pa coronar los 925 metros del Portiellu, pero tuvimos que xintar bien aína, unu porque’l fríu yera brutal, les manos taben tan tarazaes que poco faltaba pa que la comida cayera’l suelu, y otru porqu’entamaben a cayer gotines de lluvia que, si bien pararon darréu, metiéronnos un pocoñín de miéu y priesa nel cuerpo.

Baxamos pues a reblagos la lladera de la sierra camín del colláu de la Canal Seca, saltamos hasta tres veces les muries que cierren los praos, y ye que les portielles, a traviés de les que yera normal pasar, taben trancaes con cuerdes y cadenes de tal manera que tal paez que los ganaderos de la zona tuvieren miéu a que daquién-yos entrase.

Una vez salvaes les muries garramos la sienda marcada como’l Camín de San Melchor, antiguu camín real de Quirós, pel que los quirosanos d’antañu, el nomáu San Melchor ente ellos, diben hastra Uviéu. La sienda amiyaba hasta’l quirosanu pueblu de La Rebol.lada, dende onde yá per carretera asfaltada pasamos xunta la ermita de San Antonio, aniciu o fin de la Ruta de Las Xanas, onde dellos caminates xintaben, pero nosotros seguimos camín de Casa Generosa, chigre situ nel pueblu de Pedroveya, caberu de Quirós y ya llindando con Morcín, onde tomamos cafetinos y ferviatos a la vera del horru.

Yera tempranu, les dos de la tarde más o menos, y ye que’l fríu y la constante amenaza de la lluvia, echáronnos p’atrás na idea orixinal de visitar la braña Buxana, subir al picu Cutiay o caleyar per Andrúas, asina que, en cuenta de baxar pel desfiladeru de Las Xanas y tener qu’esperar hasta les 18:30 pol bus d’Uviéu, escoyimos tirar hasta la llocalidáde Puertu, yá nel conceyu d’Uviéu y onde ta la cabecera d’una llinia del bus urbanu.

Asina ye qu’echamos a caleyar pel camín que xune los pueblos de Pedroveya y Dosangu y dende ehí pela carretera un pedacín, hasta garrar un senderucu que baxa al pueblu de Llavares y otra vez un cachu de carretera hasta Cotomonteros, poco dempués del cual garramos una caleyina, muncho más embarrada que la última vez que’l Ramón Mercader anduviera per eses tierres, y ye que les rodaes d’un tractor o similar daben testimoniu del pasu d’una d’eses máquines infernales detrozacaminos, que funden el suelu dexando’l tarrén estrozáu y asegurando que les lluvias, por escases que seyan, dexen too fecho un llamargal.

Non obstante pasar pasamos, y y´el tarrén taba un poco meyor cuando llegamos al pie de la Peña Llagos y, na bifurcación na qu’hai qu’escoyer el camín a Siones, a manzorga, o a Puertu, a mandrecha, garramos esti últimu p’aportar finalmente a los barrios de El Valle y L’Arquera, onde nos esperaba yá’l bus del L3 a eso de les 18:00 de la tarde, dempués d’unos 20 kilómetros d’un fermosu día, nel que’l cielu, en contra de toles previsiones, respetó’l  caleyar de la xente del Grupu de Montaña Ramón Mercader.

• Tuesday, March 22nd, 2011

El domingo día 27 volveremos a intentar ir a la Sierra de Serandi. La descripción completa de la ruta, distancia, mapas etc. la podéis ver en la publicación:       http://gmramonmercader.radioqk.org/archives/el-domingu-13-de-marzu-a-la-sierra-de-serandi/

La hora y el lugar de quedada son los mismos: 8:45 de la mañana del domingo día 27 de marzo en la dársena 31 de la estación de autobuses de Oviedo ¡¡OJO!! En la madrugada del sábado al domingo se realizará el cambio de hora, tenedlo en cuenta, la cita es a las 8:45 de la nueva hora.

• Sunday, March 13th, 2011

Dado que no había nadie en el punto de partida la salida de hoy se ha cancelado.

Category: Uncategorized  | One Comment
• Tuesday, March 08th, 2011

El prósimu domingu, día 13 de marzu a les 8:45 de la mañana quedaremos na Estación d’Autobuses d’Uviéu, en concretu nes dársenes 31 y 32 pa coyer el bus de Transportes Bimenes que nos llevará hasta Las Xanas, nes conceyu de Santu Adrianu, dende ehí caleyaremos pela sienda l’osu hasta’l cercáu onde viven Paca y Tola,nel monte Fernanchín, pa enfilar entóncenes pela foz de Picarós, qu’arrodiando dichu monte nos lleva hasta la aldea de Serandi, na lladera de la sierra del mesmu nome, pela qu’acenderemos hasta aportar al colláu Portiellu, no más alto de la sierra, dende’l cual descenderemos al colláu de La Canal Seca y pel bocarón d’Andrúas aportaremos a la braña Buxana, ún de los sitios más fermosos del universu. Dende la braña podemos ascender a los Picos Cutiay o Andrúas, dende onde vamos tener una perbona vista de tol puertu Andrúas, los collaos que lu zarren al norte, Pan de La Forca, y al sur, Pandu la Mortera, la sierra de Serandi, Proaza…

A continuación descenderemos pela sienda señalizada como parte de la ruta de San Melchor, pasaremos pela aldea de La Rebol.lada y la ermita de San Antonio, dende la que enfilaremos pela sienda conocida como Ruta de Las Xanas pa, a les 18:30 garrar el bus de vuelta a Uviéu.

En total serán unos 16-18 kms, si el día ta guapu podemos aprovechar pa pasear peles praderes del Colláu de La Canal Seca y del Puertu Andrúas, si nos da per ehí tamién podemos dir a tomar dalgo a Casa Generosa, en Pedroveya, que ye sitiu mui recomendable.

Como’l viaxe será en trasnsporte públicu, nun ye necesariu apuntase, con tar na estación a la hora, ye abondo.