Esti ye’l Grupu de Montaña de Radio QK, y esta ye un pocoñín la so historia:

 Corríen los entamos de los años 90 y d’aquella la ciudá d’Uviéu nun yera nin más nin menos rancia de lo que ye anguaño, pero si qu’a lo meyor había un poquiñín más de separación ente lo que yera la mayoría: xente respetable y de bon vivir, y la minoría, puxarra social impropio d’una ciudá que tenía ganao, por méritu propiu, el ser una de les más pijes del reinu (dellos uvieínos retrucaben indignaos: “a la clase clase llámenla pijería”).

 Por fortuna pa los más de los ciudadanos, esa xente inadaptao, de playeros negros, aros nes oreyes y  pelos llargos o cabeces rapaes cuan militares, (pese a que, curiosamente, dempués nun queríen facer la mili), teníen un guetu afayadizu pa pasar los sos escesos de fin de selmana ensin molestar muncho.

 Inda recuerdo la primer vez que pasé de la Plaza l’Ayuntamientu, exemplu cualquier sábadu pela tarde-nueche d’elegancia y llimpieza (por daqué d’aquella la ciudá entamaba a ganar escobes d’oru) a aquel ñeru de porquería y xente con males traces denomáu popularmente col nome d’ún de los gafientos chigres ellí asitiaos: la Plaza’l Monster, ún de los puntos que, xunta’l Postigu, la Plaza’l Paragües y el Campillín, llindaben la corripa d’antros ruidosos y malgolientes nos que xuntaba cada  finde selmana lo peor de la ciudá.

Yera aquel un piñu de desfechos sociales ya imprecisa ideoloxía izquierdosa que nun diba más allá de la veneración del espíritu revolucionariu implícitu nel porru ya’l calimochu y, como muncho, dalgo d’antifacismu,  insumisión al serviciu militar y poco más. Non abstante habíalos también más fonderos no ideolóxico, que mesmo buscaben enemigos más allá de nazis y policías y llegaben a acusar a aquellos que se diferenciaben de les sos creencies namás en dalgunos detallinos ensin importancia, pero consideraos pela otra parte fundamentales.

Ún d’estos últimos, un individuu, cola cabeza cuidadosamente pelada, botes militares, y un cinchu militar con una foz y un martiellu doraos por hebilla, sentía especial despreciu por aquellos que, comunistas como él, siguíen les doctrines que formulara ciertu excomandante’n xefe (del mesmu exércitu, por ciertu, al que perteneciera’l cinchu aquel) cuando cayera en desgracia (y ye que cuando se pierde’l poder faise ún mui radicalote). Dábase amás el casu de que munchos d’aquellos seguidores  gustaben de llevar los pelos llargos, motivu de más pa que’l nuesu amigu, apoloxeta del tosquiláu al milímetru, esbabayare ensin descansu contra ellos.

 Dábase la casualidá de que l’ex-xefe militar en cuestión fuera condergáu a muerte pol elementu que-y quitara’l choyu, consiguientemente faltó-y tiempo pa salir por pates.

La sentencia siguió’n pie y, años dempués,  un señor nomáu Ramón Mercader, que recibiera l’encargu de llevala a cabu, dempués de munchu tiempu de llabor detectivesco, (lleváu a cabu con gran esfuerzu y tesón, too hai que dicilo) atopó al proscritu alló per México, fizo finxida amistá con él, garró confianza y, nuna ocasión na que’l condergáu-y dio la espalda, clavó-y un piolet, ferramienta montañera onde les haiga, en metá de la cabeza.

Ye importante dicir que la muerte por pioletazu nun yera nada que don Ramón llevara yá pensao, sinón que, senciellamente, cuando se presento’l momentu, llevaba escondíes nel gabán un cuchiellu, una pistola y una daga, pero escoyó’l piolet por puru ensañamientu. L’arma nin siquiera aseguraba la muerte, pero aseguraba que, de producise, fuera como la d’un perru.

 Y ye por motivu d’esta historia que, el peláu en cuestión, básicamente pa molestar, pintó na parede d’enfrente d’un antru d’aquellos de mala muerte, un grafitti que dicía:  “Grupo de Montaña Ramón Mercader”, completada la pintada col dibuxu esquemáticu d’un par de piolets cruzaos, queriendo facer con ello inxeniosa burlla del pintorescu asesinatu del gran timonel ideolóxicu d’aquellos a los qu’él odiaba.

 (Ye de reseñar que la política d’eliminar cualquier pintada de la ciudá en menos de 24 hores inda nun taba vixente entóncenes -pesie a la escoba d’oru-, y la pintada aquella tuvo ellí demientres unos cuantos meses, sinón fueron años).

 

 

 Casi una década más tarde de los socesos qu’equí son relataos, cuando yá la insumisión dexara de ser delitu, cuando’l peláu aquel dexara de vivir na ciudá cuantayá, y cuando munchos de los peludos aquellos, destinatarios de la ácida retranca de la pintada, cortaren el pelo y cambiaren d’ideoloxía, dos d’aquellos desfechos sociales de los 90 entamaben el nuevu sieglu, supuestamente adaptaos a la sociedá, con títulos universitarios, trabayos asalariaos y demás signos esternos de normalidá pero, por embargu, sintiendo un fondu desasosiegu interior, efectu secundariu ensin dulda d’aquella xuventú descarriao.

De siempre l’exerciciu físicu foi una buena técnica  pa reducir l’ansiedá,¿sería  por eso qu’escomencipiaron a visitar les montañes que los arrodiaben? El casu ye que lo menos una vez por selmana, afuxíen de la ruidosa ciudá, garraben les sos bicicletes y allegábense a les montañes a la vera d’esta capital (que lo meyor que tien, nun sé au lo oyí, ye lo fácil que resulta salir d’ella).

Caleyaben entóncenes per brañes, viesques, picos y collaos mientres les sos bicicletes aguardaben candaes a dalguna estaca al pie del monte. Y eso yera maravillosu. Esa yera la manera de recargar la enerxía necesario pa malvivir una selmana más na esquizofrénica sociedá que-yos tocara’n suerte, esi yera’l motivu de que, aparentemente, llevaren una vida adaptao, en cuenta de, ¿quién sabe?¿Garrar una escopeta y entamala a tiros dende un balcón?¿Suicidase atacando una comisaría?¿Tirase dende un teyáu? Hai milenta maneres d’espresar el disgustu.

 Dióse la casualidá de qu’un de los rapazos recordare la pintada aquella que, cuantayá, adornara una parede del guetu d’antisociales aquel que frecuentaben na mocedá, y decidió retomar aquel sonoru nome pa les sos actividaes, seríen la plasmación d’aquel títulu surdíu namás como retranca y, seguramente, ensin albidrar que pudiere llegar dacuando a denomar a un auténticu grupu montañeru.

 L’actividá siguió mientres munchos años, en dalgún casu sumóse más xente, pero nunca más de cuatro persones fueron parte d’aquel informal grupu. Namás de xemes en cuando esconsoñaba, más en broma que’n serio, la idea d’un piñu de persones percorriendo les montañes d’Asturies baxo la enseña del Grupu de Montaña Ramón Mercader.

Y eso foi, non más qu’un suañu, qu’un borrosu deséu ensin nenguna esperanza real de llevase a cabu  hasta que, nel entamu de la segunda década del sieglu XXI, casi 20 años dempués de los primeros fechos equí relataos, resulto que na Radio QK, la radio llibre d’Uviéu, esa otra fonte tan importante d’actividá ansiolítico, surdió la idea de montar una actividá paralelo, un grupu de montaña que permitiera a la xente de la radio, y a cualquiera que nun formara parte d’ella, pero quixera respirar de xemes en cuando aire menos contaminao que’l de la urbe o llenar los güeyos de verdor más allá del céspede d’un campu fúbol, facelo con amigos, con una xente felizmente inadaptao, consciente d’ello y, asina too, arguyoso.

Faltó tiempu pa suxerir el nome “Ramón Mercader”, nome que foi acoyíu con entusiasmu por toos y adoptáu por unanimidá.

 Y d’esta manera’l suañu fízose realidá:  abrióse una web n’internet p’avisar de les salides y colgar semeyes de los nuesos paseos peles montañes, diseñóse un logo afayadizu col focicu d’aquel home que nos cedia’l so nome y los dos piolets cruzaos, reminiscencia d’aquellos otros pintaos na parede, convocóse una ruta, colgáronse na web mapes y altimetríes y asina foi como, 2 décades más tarde de la pintada, un 17 d’abril del añu 2010, 9 persones inauguraben el refundáu Grupu de Montaña Ramón Mercader.

 

Y van yá dellos años dende esi día, más d’un cientu salíes celebraes, docenes de persones vinieron con nosotros, nun sé cuántos conceyos d’Asturies visitaos, tierres de Llión y Galicia yá pisaes, y unos cuantos celebros un poco más osixenaos.

Y anguaño más vivos que nunca, coles mesmes ganes o más que’l primer día, con milenta proyectos na cabeza, y con ganes de siguir medrando ¿siguirá esistiedo’l grupu d’equí a otru añu? Nun tengo nin idea nin, la verdá, me preocupa muncho, porque lo importante igual nun ye esmolecese pol futuru, sinón disfrutar del presente.